Prosjektstyret for Lyseparken tilsette måndag Fredrik Seliussen (36) som ny utviklingsdirektør for området.
Seliussen har bakgrunn frå byggje- og eigedomsbransjen og kjem no frå stillinga som direktør for forretningsutvikling i Waldegruppen. Der har han mellom anna hat ansvar for kjøp og utvikling av eigedom, konseptuell utvikling og finans. Seliussen har vore tilsett i Waldegruppen i ulike stillingar sidan 2003, og har vore med på utviklinga av selskapet frå ein omsetning på 47 mill kr i 2003 til ca 700 mill i 2013, melder ordførar Terje Søviknes i ein pressemelding.
Seliussen er busett i Meland kommune saman med samboer og to barn, og vil pendla til Os når han tek til i stillinga tidleg på hausten.
Seliussen er utdanna siviløkonom frå NHH, og har parallelt med engasjementet i Waldegruppen også tatt ein Executive MBA i merkevareledelse, konseptutvikling, kommunikasjon og markedsstrategi. Samla har han alle føresetnader for å lukkast i arbeidet med å utvikla Lyseparken til det nye kraftsenteret for næringsetablering i Bergensregionen.
Lyseparken ligg i Endelausemarka v/ny trase for E39 Os-Bergen, og målsettinga er å opparbeida næringsområdet parallelt med vegprosjekt i perioden 2013-19. Os kommune står som hovudeigareigar av området og nyleg vart 500 mål regulert til næringsføremål retta mot storhandel, kontor og industri/lager.
Os kommunestyre har oppnemnd følgjande prosjektstyre for utvikling av Lyseparken; – leiar Terje Søviknes (Os kommune), sivilarkitekt og planlegger Tore Jensen (OPUS), Lasse Færøvik (marknadsføring og eigedomsutvikling), kommunalsjef Karl Ole Midtbø (Os kommune) og dagleg leiar Ottar Randa (Os Bygg og Eigedom AS). Fredrik Seliussen vil rapportera direkte til prosjektstyret.
